NAGHIHINALA ang isang mambabatas sa Kamara na ginagawang gatasan ng mga tiwaling indibiduwal o korporasyon ang missionary subsidies dahil imbes na lumiliit ay palaki nang palaki ang ayudang ito sa power sector.

Ginawa ni House assistant minority leader Carlos Zarate ng Bayan Muna ang nasabing hinala dahil lolobo umano sa P28.373 billion ang missionary subsidies sa susunod na taon.

Ayon sa mambabatas, sinimulan ang missionary subsidies nang isapribado ang power generation noong 2002 kung saan P2.47 billion ay inilaan para bigyan ng ayuda ang power sector sa

malalaking isla na hindi konektado sa national grid tulad ng Palawan, Mindoro Oriental and Occidental, Masbate, Marinduque, Romblon, Tablas, Catanduanes, Bantayan Island, Siquijor, Camotes Island, Sulu, Basilan at Tawi-Tawi.

Layon ng ayudang ito na tulungan ang power sector sa mga nabanggit na lugar para mailawan ang buong isla na kanilang nasasakupan.

“The missionary subsidy, which has already skyrocketed to P6.16 billion by 2014, P11.81 billion in 2016, is even forecasted by NAPOCOR to reach P19.35 billion 2020. The subsidy is also expected to balloon to P28.373 billion by the end of 2021,” ani Zarate.

Dahil dito, duda ang mambabatas na ginagawang gatasan ang missionary subsidy na ito habang nagdurusa naman ang mga consumer sa buong bansa dahil pataas nang pataas ang singil sa kuryente para pondohan ang subsidies na ito sa mga power sector sa nasabing mga lugar.

“Electric consumption in these areas increased on only 26% during the 5 year period. Instead of going down because supposedly more areas were given access to electricity the missionary subsidies skyrocketed,” ayon pa sa mambabatas.

Ito ang dahilan kaya umapela ang mambabatas kay Department of Energy (DOE) Secretary Alfonso Cusi na bantayan ang  missionary subsidies na ito dahil hindi katanggap-tanggap na patuloy ang paglaki nito habang tumatagal. (BERNARD TAGUINOD)