UMABOT na sa mahigit 53 milyon ang naimprentang balota para sa May 2025 elections, ayon sa Commission on Elections (Comelec).

Base sa datos, kabuuang 53,894,129 balota ang naimprenta na o 76.58% ng 72 milyong kinakailangan. Ang kabuuang 16,338,956 balota pa ang natitira na kailangang iimprenta.

Unang sinabi ni Comelec Chairman George Garcia, target na makapag-imprenta ng 1.5 milyong balota upang makabawi sa pinaikling timeframe para sa produksyon ng opisyal na balota.

Nagpahayag din siya ng kumpiyansa na makukumpleto ng Comelec ang proseso ng pag-imprenta sa Abril 14, 2025.

Gayunpaman, sinabi ni Garcia, ang pag-imprenta ay tumaas sa 1.7 milyong balota kada araw at ang Comelec ay nagnanais na makumpleto ang proseso ng pag-imprenta ng balota sa Marso at verification ng balota sa Abril.

Ayon kay Garcia, basta magtuloy-tuloy ang performance ng makina ay maaaring sa ikalawang linggo hanggang ikatlong linggo ng Marso maaring matapos ang ballot printing.

Magugunita na ipinagpatuloy ng Comelec ang pag-imprenta ng opisyal na balota noong Enero 27, isang linggo matapos itong suspendihin nang maglabas ng temporary restraining order ang Korte Suprema laban sa diskwalipikasyon ng ilang kandidato. (JOCELYN DOMENDEN)