TARGET ni KA REX CAYANONG
SA gitna ng ingay ng opinyon at emosyon ng publiko, mahalagang balikan ang pinakapundasyon ng batas: ang bawat akusado ay inosente hangga’t hindi napatutunayang nagkasala. Ito ang kontekstong dapat pagtuunan sa naging desisyon ng Manila Regional Trial Court na payagan ang piyansa ni dating Cong. Arnolfo “Arnie” Teves Jr. sa kasong murder noong 2019.
Hindi basta-basta nagbibigay ng piyansa ang hukuman, lalo na sa mabibigat na kaso.
Ang batayan nito ay malinaw—kung ang ebidensya ng prosekusyon ay hindi sapat upang magpatunay ng matibay na kaso, may karapatan ang akusado sa pansamantalang kalayaan.
Sa desisyong ito, ipinakita ng korte na umiiral ang prinsipyo ng due process, hindi ang hatol ng publiko o pressure ng pulitika.
Madalas nating marinig ang panawagan para sa hustisya, ngunit ang tunay na hustisya ay hindi nakabatay sa galit o haka-haka.
Ito ay nakasandig sa ebidensya, proseso, at batas.
Kung papayagan nating manaig ang opinyon kaysa legal na pamantayan, binubuksan natin ang pinto sa mapanganib na precedent kung saan maaaring hatulan ang sinoman nang walang sapat na batayan.
Gayunpaman, hindi rin nangangahulugan ang piyansa ng kawalang-sala.
Si Teves ay nananatiling nahaharap sa iba pang mabibigat na kaso at patuloy na daraan sa proseso ng paglilitis.
Ang mahalaga ang sistema ay gumagalaw ayon sa nararapat—hindi minamadali, hindi pinipigil, kundi sinusunod ang itinakdang landas ng batas.
Sa panahong madaling maimpluwensyahan ng social media at ingay ng masa, ang ganitong desisyon ay paalala na ang hukuman ay hindi dapat magpaapekto sa popular na opinyon.
Ang kanilang tungkulin ay mananatiling patas at tapat sa batas, kahit pa ito’y hindi tanggap ng lahat.
Sabi nga, ang tunay na hustisya ay hindi pinagdedesisyunan ng damdamin—ito ay pinatutunayan ng ebidensya at pinangangalagaan ng batas.
80 
