(NI JG TUMBADO)

TULUYANG pinalaya ng korte matapos makapagpiyansa ng P12 milyon si dating Daraga , Albay Mayor Carlwyn Baldo, ang itinuturong mastermind  sa pagpatay kay dating AKO BICOL Partylist Rep. Rodel Batocabe, noong Disyembre 22 ng nakalipas na taon.

Ito ang kinumpirma ni Police Regional Office (PRO) V Director Police Brig. Gen. Arnel Escoval na ganap na alas 4:45 ng hapon araw ng Lunes, nakalaya si Baldo.

Una nang naglagak ng P 12 milyon piyansa si Baldo kaugnay ng 2 counts ng murder at 6 counts ng frustrated murder matapos namang aprubahan ng korte na makapagpiyansa ito noong Agosto 30.

Gayunman, naantala ang pagpapalaya kay Baldo matapos namang maghain ng Motion for Reconsideration (MR) ang pamilya ni dating Rep. Batocabe.

Si Baldo ang itinurong mastermind ng mga nasakoteng suspect sa pagpatay kay Batocabe at escort nitong si dating SPO2 Orlando Diaz sa covered court sa gymnasium ng Brgy. Burgos , Daraga, Albay noong Disyembre 22, 2018.
Ang insidente ay nagresulta rin sa pagkasugat ng anim na iba pa habang namamahagi ng pamaskong regalo ang dating solon sa mga senior citizen at mga may kapansanan.

Hindi naman mabibigyan ng anumang security escort ng pulisya si Baldo.