IPINABABALIK ng mga lider ng iba’t ibang partido sa Mababang Kapulungan ng Kongreso ang 2026 National Expenditure Program (NEP) sa Department of Budget and Management (DBM) matapos lumutang ang mga kwestiyonableng alokasyon, hindi lamang sa Department of Public Works and Highways (DPWH) kundi maging sa iba pang ahensya ng gobyerno.
Sa isang press conference kahapon, sinabi ni National Unity Party (NUP) chairman at Antipolo City Rep. Ronaldo Puno na nagpasya silang irekomenda ang pagbabalik ng NEP, kasama ang mga lider mula sa Lakas-CMD, Nationalist People’s Coalition (NPC) at iba pang partido, upang hindi sila maakusahang kasabwat sa umano’y problemadong budget.
Ayon kay Puno, 90 porsiyento ng district budget ng DPWH ang “mangled” o sira ang pagkakahati, kung kaya’t nangangamba silang madamay kung ipipilit ang NEP.
Natuklasan din umano na wala sa 2025 General Appropriations Act (GAA) at maging sa NEP 2026 ang P8 bilyong nakalaan dapat sa pagbili ng armas ng Philippine National Police (PNP) at Department of the Interior and Local Government (DILG). Pinaghihinalaan ng ilang kongresista na posibleng isisingit ito sa bicameral conference committee.
Binanggit din ni Puno na may kaparehong isyu sa Department of Agriculture, partikular sa halos P10 bilyong pondo para sa farm-to-market roads, na umano’y ipinapasa sa ilang pribadong grupo.
Dagdag pa ni Puno, mismong si DBM Secretary Amenah Pangandaman ang umamin na hindi nila inisa-isa ang pagsusuri sa mga proposed budget ng mga ahensya, gaya ng DPWH, na may nakitang double entries, dobleng alokasyon, at mga proyektong tapos na ngunit muling pinondohan.
“We have decided as a group to recommend the return of the 2026 national budget to the DBM because we don’t know how to deal with it. We practically have to re-do the entire submission,” pahayag ni Puno.
Aniya, hihilingin nila kay House Speaker Martin Romualdez na pabalikin ang NEP sa DBM at itigil muna ang deliberasyon ng 2026 budget hangga’t walang malinaw na desisyon mula sa liderato.
“We cannot, in good conscience, begin deliberations on a national budget that is riddled with questionable allocations. The House owes it to the Filipino people to ensure that every peso is allocated properly, transparently, and free of corruption. At this point, the 2026 NEP falls short of that standard,” giit ni Puno.
(BERNARD TAGUINOD)
151 
