NANAWAGAN si Senador Christopher Bong Go sa Department of Education (DepEd) at Commission on Higher Education (CHED) na isaalang-alang ang maraming bagay sa  isyu ng paglilipat sa online platforms sa pag-aaral ng mga estudyante.

Ipinaliwanag ni Go  na hindi lang ang kakayahan ng gobyerno ang mag-a-adjust  sa new normal kundi dapat ding tingnan ang kapasidad ng mga estudyante sa “new norm of education” o ang
online education.

Aniya, hindi na lang ang pag-iisip kung paano makapag-aaral ang inaalala ng mga estudyante ngayon kundi kung paano sila mabubuhay sa pang-araw-araw na pangangailangan kung saan
marami sa mga nasa kolehiyo ang nagtatrabaho rin habang nag-aaral.

Iginiit din ni Go ang kanyang paninindigan na no vaccine, no face to face traditional classes sa mga eskuwelahan tulad din ng  posisyon ni Pangulong Rodrigo Duterte.

Sinabi nito na pare-pareho naman aniyang batid ang kahalagahan ng edukasyon subalit mas mabuti na unahin ng lahat ang “right to live” dahil mawawalan ng saysay ang lahat kung magkakasakit
naman ang mga estudyante. (NOEL ABUEL)