CEBU – Iniutos na isailalim sa medico legal examination ang bangkay ng isang dalagita na hinihinalang ginahasa muna bago pinatay ng ka-eyeball na lalaki na nakilala lamang niya sa online sa Toledo City sa lalawigan.

Target ng manhunt operation ang nakatakas na suspek na nakuhanan ng CCTV habang palabas ng hotel.

“Ipinakita namin sa room boy ang malinaw na CCTV footage na mayroon kami at positibong natukoy niya ang lalaking kasama ng biktima noon,” ayon kay Police Lt. Col. Manolo Salvatierra ng Toledo City Police Station.

Ayon sa ulat ng Toledo City Police Office, wala nang buhay nang madiskubre ang biktima na isang grade 12 student, na may busal ang bibig at nakatali ang mga kamay.

Nabatid na nadiskubre ng roomboy ang bangkay ng biktima nang katukin niya ang kuwarto dahil check-out time na subalit walang sumasagot kaya napilitang buksan nito ang kwarto sa lodging inn.

Lumitaw sa follow-up investigation na nagpaalam ang 18-anyos na biktima na dadalo sa isang dance party ng kanyang mga kaklase, ayon sa salaysay ng mga kapatid nito.

Lingid sa kanilang kaalaman, nakipagkita pala ang biktima sa suspek na nakilala niya sa online at nagkayayaang mag-eyeball hanggang sa pumasok sila sa isang lodging house. (JESSE KABEL RUIZ)