KINONDENA ng Philippine Sanjia Steel Corporation ang isinagawang raid ng Presidential Anti-Organized Crime Commission at National Bureau of Investigation at tinawag itong isang “manufactured crisis” na nakabatay umano sa hindi beripikadong alegasyon at corporate sabotage.

Ayon sa kumpanya, naging isang agresibong operasyon ang dapat sana’y ordinaryong pagsusuri lamang na nagdulot ng pagkaantala sa legal nitong operasyon at pagkawala ng kabuhayan ng daan-daang empleyado.

“This was not about public safety. This was harassment packaged as law enforcement,” pahayag ng legal counsel ng kumpanya na si Atty. Julia Chu.

Isinagawa ang raid ng PAOCC sa ilalim ni Executive Director Undersecretary Benjamin Acorda Jr., sa 22.7-ektaryang manufacturing facility ng Sanjia Steel sa loob ng PHIVIDEC Industrial Estate sa Tagoloan.

Ikinatwiran ng PAOCC na sangkot umano ang planta sa hazardous industrial processing, paggawa ng substandard steel products, at pagkakaroon ng koneksyon sa ilegal na Philippine Offshore Gaming Operations o POGO.

Ngunit iginiit ng Sanjia Steel na ilegal at hindi naaayon ang paggamit ng search warrants at pagdetine sa kanilang mga empleyado dahil administratibo lamang umano ang mga alegasyon.

“These alleged infractions fall strictly under the regulatory supervision of civilian agencies. Legitimate compliance checks are handled through a standard Notice of Violation (NOV), not by executing criminal search warrants,” paliwanag ni Atty. Chu.

Matapos ang raid ay pansamantalang ipinasara ang planta habang hinihintay ang court proceedings.

Ayon sa kumpanya, mahigit 300 manggagawang Pilipino ang agad naapektuhan at nawalan ng hanapbuhay dahil sa pagsasara ng planta.

Nagkaroon na rin umano ng mga protesta sa ilang bahagi ng Mindanao kung saan humihingi ng agarang pagbubukas muli ng planta ang mga empleyado.

“We demand the immediate reopening of the factory because our Filipino workers are hungry,” ayon sa pahayag ng kumpanya.

Kinuwestiyon din ng Sanjia Steel ang alegasyon na gumagawa sila ng substandard steel products dahil wala umanong kinatawan mula sa Department of Trade and Industry-Bureau of Philippine Standards sa isinagawang inspeksyon.

Iginiit ng kumpanya na pasado sa engineering at structural standards ang kanilang mga produkto at may hawak silang valid Product Standard certifications.

Tinawag din ng kumpanya na “baseless” at “sensationalized” ang alegasyon hinggil sa uranium at toxic nuclear waste.

Ipinaliwanag ng Sanjia Steel na gumagamit sila ng imported Japanese scrap metal na dumaraan sa mahigpit na pagsusuri at sertipikasyon mula sa Japan at Department of Environment and Natural Resources.

Nagbabala rin ang kumpanya na maaaring makaapekto sa diplomatic relations ang walang basehang alegasyon tungkol sa radioactive materials mula sa Japan.

Ipinagtanggol din ng Sanjia Steel ang 69 foreign technical specialists na nadetine sa raid at sinabing lehitimong engineers ang mga ito na tumutulong sa operasyon ng specialized machinery at technology transfer.

“All foreign personnel hold valid immigration documents and active Alien Employment Permits,” ayon kay Atty. Chu.

Inakusahan din ng kumpanya ang mga awtoridad ng paglabag sa due process matapos umanong harangin ang kanilang legal team na makapasok sa planta sa loob ng halos 24 oras.

Ayon sa Sanjia Steel, nilabag umano nito ang Article III, Section 12 ng Philippine Constitution dahil hindi nabigyan ng access sa abogado ang mga empleyado at dayuhang technicians.

Kinuwestiyon din ng kumpanya kung bakit wala sa operasyon ang mga ahensyang may direktang hurisdiksyon tulad ng Department of Environment and Natural Resources, Bureau of Immigration, at Securities and Exchange Commission.

“These regulatory agencies have direct jurisdiction over the allegations raised during the raid,” dagdag pa ni Atty. Chu.

Itinanggi rin ng Sanjia Steel ang alegasyon na konektado pa rin ito sa negosyanteng si Tony Yang at iginiit na nakapag-divest na umano ito batay sa records ng SEC.

Pinabulaanan din ng kumpanya ang alegasyong may kaugnayan sila sa POGO operations dahil wala umanong nakuhang servers, data hubs, o gaming infrastructure sa isinagawang search.

“We find it deeply troubling that broad and highly publicized allegations were used to justify an operation of this magnitude,” ayon pa sa legal counsel ng kumpanya.

Nanindigan ang Sanjia Steel na lehitimong steel manufacturing operation ang kanilang negosyo at nagdulot umano ng malaking pinsala sa reputasyon at kabuhayan ng kanilang mga manggagawa, suppliers, at business partners ang mga alegasyon laban sa kanila.

Sa gitna ng kontrobersiya, inanunsyo rin ng kumpanya na mag-iimbita sila ng independent international auditors at Japanese suppliers upang patunayan ang kanilang compliance at operational standards.

(TINA MENDOZA)