NAIBULSA ni world No. 3 EJ Obiena ang pangalawang gintong medalya sa Germany sa loob lang ng halos isang linggo.
Nakuha ng Asian pole vault record holder ang latest win sa True Athletes Classic sa Leverkusen, Germany matapos makumpleto ang 5.81 meters.
Napantayan ito ng second at third placer na sina Rutger Koppelaar ng Netherlands at Kurtis Marschall ng Australia, ngunit napunta ang gold kay Obiena sa pamamagitan ng ‘countback’.
Ilang araw pa lang ang nakararaan nang nanguna rin ang 26-anyos na si Obiena sa Internationales Stabhochsprung-Meeting sa Jockgrim matapos magtala ng 5.81m.
Sinubukan ni Obiena magtala ng bagong personal best subalit tatlong beses siyang nabigo sa 5.95-m mark.
Hindi ito ang unang medalya ni Obiena ngayong taon, nag-bronze sa World Athletics Championships sa Oregon noong nakaraang buwan at nakapag-set ng bagong Asian record, 5.94m. (VT ROMANO)
385
