TINATAYANG nasa P108 milyong halaga ng ilegal na droga ang nasamsam ng mga tauhan ng Philippine Drug Enforcement Agency Region XIII (PDEA RO XIII), katuwang ang iba pang law enforcement agencies sa isinagawang anti-narcotics operation na nagresulta sa pagkakadakip sa dalawang hinihinalang big time drug dealer sa Caraga Region.
Ayon sa ulat na ipinarating sa tanggapan ni PDEA Director General Moro Virgilio Lazo, nasa 16 kilo ng shabu ang nakuha sa dalawang suspect matapos ang ikinasang buy-bust operation.
Ayon sa ulat, bandang alas-6:40 ng umaga kahapon naisakatuparan ng PDEA RO13 ang inilatag na buy-bust sting sa Purok 1, Barangay Sta. Irene, Bayugan City, sa pangunguna ng PDEA RO XIII’s Agusan del Norte at Agusan del Sur Provincial Offices, katuwang ang Bayugan City Police Station at Agusan del Sur Police Provincial Office’s Provincial Intelligence Unit (ADSPPO – PIU).
Nakuha ng mga awtoridad ang 16 self-sealing plastic bags ng methamphetamine, na isinilid sa packaging ng local courier services.
“Of the confiscated items, two kilograms were buy-bust items, while 14 kilograms were seized as evidence of possession,” ayon sa ulat.
Kabilang sa non-drug items na sinamsam ng mga tauhan PDEA ang limang digital weighing scales, glass pipe, assorted packaging materials, ang ginamit na buy-bust money, at communication devices na pinaniniwalaang ginagamit sa kanilang ilegal na transaksyon.
“This operation underscores the importance of multi-agency collaboration and community involvement in achieving impactful results in the campaign against illegal drugs. Our combined efforts reflect our shared commitment to protecting the community and ensuring a safer future for all,” pahayag ni PDEA RO XIII Regional Director Levi S. Ortiz.
Nasa kustodiya ng PDEA RO13 ang nahuling droga at iba pang ebidensya para sa proper disposition, habang inihahanda nang kasong paglabag sa Sections 5 and 11, Article II ng Republic Act No. 9165, o Comprehensive Dangerous Drugs Act of 2002 para sa dalawang hinihinalang high value target na kanilang nadakip. (JESSE KABEL RUIZ)
