MARIING nanindigan ang Armed Forces of the Philippines (AFP) na hindi nito pababayaan o iiwan ang BRP Sierra Madre sa Ayungin Shoal, kasunod ng pahayag ng Chinese Embassy sa Maynila na may umano’y kasunduan para alisin ng Pilipinas ang barko sa naturang lugar.
Ayon kay AFP spokesperson for West Philippine Sea Ret. Rear Adm. Roy Vincent Trinidad, walang umiiral na kasunduan na nag-uutos sa Pilipinas na alisin ang BRP Sierra Madre sa Ayungin Shoal.
“The AFP rejects the recent statement from the Chinese Embassy in Manila attempting to rewrite history regarding the presence of the BRP Sierra Madre at Ayungin Shoal,” pahayag ni Trinidad.
Nilinaw niya na nananatili ang BRP Sierra Madre bilang bahagi ng lehitimong presensya ng Pilipinas sa West Philippine Sea.
Ayon kay Trinidad, kinilala sa 2016 Arbitral Tribunal ruling ang Ayungin Shoal bilang bahagi ng Exclusive Economic Zone (EEZ) ng Pilipinas.
Binigyang-diin din ng AFP spokesperson na nagpapakalat lamang ng maling impormasyon ang Chinese Embassy sa Maynila kaugnay ng presensya ng BRP Sierra Madre at tinatangkang baligtarin ang kasaysayan ng mga pangyayari sa West Philippine Sea.
Inihalimbawa ni Trinidad ang Panganiban Reef o Mischief Reef na umano’y inookupa ng China noong 1995.
“Let us look back to 1995 when the CCP first illegally occupied Panganiban Reef (Mischief Reef)—a feature within our EEZ),” ani Trinidad.
Ayon sa kanya, una umanong sinabi ng Chinese government na ang mga istrukturang itinayo sa lugar ay mga “shelters for local fishermen,” ngunit kalaunan ay naging isang malaking military installation.
Giit ni Trinidad, nagsisilbing konkretong halimbawa ang Mischief Reef sa umano’y maling impormasyon ng China hinggil sa mga aktibidad nito sa West Philippine Sea.
Muling iginiit ng AFP na mananatili ang BRP Sierra Madre sa Ayungin Shoal at hindi nito ito iiwan.
(JESSE RUIZ)
62 
