IGINIIT ni Chairman Emeritus Dr. Jose Antonio Goitia na hindi dapat gamitin ng China ang mga Pilipinong manggagawa bilang panangga o pambala sa alitan ng dalawang bansa.
Kasunod ito ng pagkumpirma ng Chinese Foreign Ministry na kumilos ang kanilang mga awtoridad laban sa mahigit 100 Pilipino dahil umano sa ilegal na pagtatrabaho at pananatili sa China.
Ayon kay Defense Secretary Gilberto “Gibo” Teodoro Jr., maaaring ituring ang naturang hakbang bilang “plain and simple extortion and blackmail” o pagganti sa mga operasyon ng Pilipinas laban sa mga Chinese national.
Sa pahayag noong Agosto 13, sinabi ng Department of National Defense (DND) na isinagawa ang mga operasyon laban sa mga Chinese national alinsunod sa mga search warrant na inilabas ng korte at ang mga inaresto ay pangunahing sangkot umano sa mga ilegal na negosyo.
Binigyang-diin din ng DND na hindi maaaring pagtuunan lamang ng China ang visa at passport concerns ng kanilang mga kababayan habang binabalewala ang mga ilegal na aktibidad na iniimbestigahan sa Pilipinas.
“Hindi maaaring gamitin ang mga Pilipinong manggagawa para gipitin ang pamahalaan ng Pilipinas. Iyan ay pamimilit, hindi diplomasya,” ani Goitia.
Iginiit niya na may karapatan ang Pilipinas na ipatupad ang sariling batas sa loob ng teritoryo nito, anuman ang nasyonalidad ng iniimbestigahan.
“Walang veto ang Tsina sa batas ng Pilipinas. Kung may Chinese national na lumabag sa ating batas, dapat siyang dumaan sa tamang proseso. Hindi dahilan ang kanyang nasyonalidad para siya ay palampasin,” dagdag niya.
Lalong uminit ang usapin matapos ang kontrobersyal na video ng China Daily na naglarawan sa mga Pilipino bilang mga unggoy, na kinondena ng Manila bilang racist, mapanghamak at nakabababa sa dignidad ng mga Pilipino.
Ayon kay Goitia, kailangan ng Pilipinas ang matatag na paninindigan nang hindi nauuwi sa walang-ingat na komprontasyon.
“Nais natin ng kapayapaan, hindi pagpapasakop. Hindi maaaring tawaran ang dignidad ng Pilipino at soberanya ng Pilipinas,” ani Goitia.
Sinabi niya na maaaring ipagpatuloy ng Pilipinas ang diplomasya sa China habang pinoprotektahan ang mga Pilipino at ipinagtatanggol ang sariling batas at soberanya.
“Isa tayong malayang bayan. Walang dayuhang kapangyarihan ang may karapatang magtakda ng ating halaga,” ani Goitia.
Si Dr. Jose Antonio Goitia ay Chairman Emeritus ng Alyansa ng Bantay sa Kapayapaan at Demokrasya (ABKD), People’s Alliance for Democracy and Reforms (PADER), Liga Independencia Pilipinas (LIPI), at Filipinos Do Not Yield Movement (FDNY). Siya ay nagtapos ng Juris Doctor at Doctor of Philosophy (PhD), at may mga advanced degree sa MNSA, MPA at MBA.
92 
