TARGET ni KA REX CAYANONG

SA oras ng emergency, bawat minuto ay mahalaga. Ang mabilis na pag-aksyon at maayos na pasilidad ay maaaring makapagligtas ng buhay.

Kaya mahalagang may ospital na kayang tumugon sa pangangailangan ng mga pasyente, lalo na sa mga panahong kailangang-kailangan nila ng agarang lunas.

Magandang balita para sa mga Quezonian ang pormal na pagbabasbas sa bagong Emergency Room (ER) ng Quezon Provincial Health Network (QPHN)–Quezon Medical Center noong Oktubre 19, sa pangunguna ni Governor Doktora Helen Tan.

Hindi lamang ito basta bagong gusali o dagdag na espasyo sa ospital. Isa itong mahalagang hakbang upang mapalawak ang kakayahan ng lalawigan sa pagbibigay ng serbisyong medikal sa mga nangangailangan.

Sa lawak na 1,698.75 metro kuwadrado, mas maluwag na pasilidad ang inilaan para sa iba’t ibang pangangailangan ng mga pasyente. May mga silid para sa isolation, minor operations, ENT at ophthalmic services, behavioral care, laboratoryo at parmasya.

Mahalaga ang mga ganitong pasilidad dahil hindi pare-pareho ang kalagayan ng mga dumarating sa emergency room. May mga nangangailangan ng agarang pagsusuri, may kailangang ihiwalay dahil sa kanilang kondisyon, at mayroon ding nangangailangan ng agarang gamutan o minor surgery.

Ang proyektong ito ay pinondohan sa pamamagitan ng 20 porsiyentong Development Fund ng lalawigan at isinagawa sa loob ng ilang taon.

Sa pamumuno ni Governor Tan, isang doktor na may kaalaman sa pangangailangan ng sektor ng kalusugan, mahalagang maipagpatuloy ang mga programang direktang nakatutulong sa mga pasyente.

Gayunman, hindi nagtatapos sa pagbubukas at pagbabasbas ng pasilidad ang hamon. Kailangang matiyak na may sapat na doktor, nars, medical technologist at iba pang health workers na maglilingkod dito. Dapat ding tuloy-tuloy ang suplay ng gamot, kagamitan at iba pang pangangailangan sa araw-araw na operasyon.

Sa pampublikong ospital, hindi dapat maging hadlang ang kakulangan sa pera upang makakuha ng nararapat na serbisyong medikal. Kaya mahalaga ang mga pamumuhunan ng pamahalaang panlalawigan sa mga pasilidad na nagsisilbi sa mayayaman man o mahihirap na mamamayan.

Hindi rin dapat makalimutan ang mga residente ng malalayong bayan na kailangang bumiyahe upang makarating sa ospital. Para sa kanila, bawat dagdag na kakayahan ng provincial medical center ay maaaring maging malaking tulong, lalo na sa mga kasong nangangailangan ng agarang atensiyong medikal.

Kaugnay nito, magandang halimbawa ang programang “Kalinga sa Mamamayan, Libreng Gamutan” na muling isinagawa sa ikaapat na distrito ng Quezon noong Oktubre 17, sa pangunguna nina Governor Tan at Vice Governor Third Alcala.

Sa naturang programa, nakatanggap ng medical consultation, ultrasound, laboratory services, screening, minor surgery, optical services, dental extraction at libreng gamot ang mga residente ng Tagkawayan.

Magkaiba man ang anyo ng dalawang proyekto, iisa ang layunin ng mga ito: mailapit sa mamamayan ang serbisyong pangkalusugan.

Dapat lamang na kilalanin ang pagsisikap ni Governor Tan na palakasin ang serbisyong pangkalusugan sa Quezon.

Bilang isang doktor at pinuno ng lalawigan, inaasahang maipagpapatuloy niya ang mga proyektong may direktang pakinabang sa publiko, kasabay ng wastong paggamit ng pondo at pananagutan sa bawat gastusin.