CAVITE – Sugatan ang isang 21-anyos na dalaga nang pagsasaksakin ng isang hinihinalang akyat-bahay na tinangkang magnakaw sa bahay ng biktima sa bayan ng Tanza sa lalawigang ito, noong Huwebes ng madaling araw.

Nilalapatan ng lunas sa ospital ang biktimang si Patricia Ann Ronquillo Aragon, ng Barangay Punta 1, Tanza, Cavite dahil sa mga saksak sa katawan mula sa suspek na si alyas “Desmar,” 33, binata, jobless, ng Barangay Punta 1, Tanza, Cavite.

Ayon sa ulat ni Police Staff Sergeant Francis Mark Cortez ng Tanza Municipal Police Station, dakong alas-4:00 ng madaling araw nang pasukin ng suspek ang bahay ng biktima sa Brgy. Punta, Tanza Cavite.

Intensiyon umano ng suspek ang magnakaw subalit nahuli ito ng biktima kaya sinaksak ang dalaga.

Tinangka ng suspek na tumakas subalit naabutan siya ng nagrespondeng mga barangay tanod habang ang biktima ay isinugod sa ospital.

(SIGFRED ADSUARA)