MULI na namang nababalot sa kontrobersya ang Philippine National Police (PNP) dahil sa pamamaril ng dalawang miyembro nito sa mga sibilyan.
Ang pinakabagong pangyayari ay ang pamamaril ni P/Master Sergeant Hensie Zinampan, nakatalga sa Police Security and Protection Group (PSPG), sa isang ginang sa Brgy. Greater Fairview, Quezon City.
Kitang-kita sa nag-viral na video sa social media ang paghawak ni Zinampan sa buhok ng 52-anyos na si Lilibeth Valdez bago niya ito barilin.
Lasing daw ang pulis nang makasalubong si Valdez, kaya binaril niya ang babae.
Ang pamamaril ng pulis sa ordinaryong tao ay hindi normal na gawain ng isang tao, lalo na kung awtoridad ang gumagawa nito.
Maselan ang pagiging pulis ni Zinampan dahil nakalataga ito sa PSPG, dibisyon sa PNP na nanganga-laga sa seguridad ng taong nanganganib din ang buhay.
Iyon pala, may itinatagong kakaibang ugali itong si Zinampan.
Ibig sabihin hindi ligtas kay Zinampan ang kanyang binabantayan.
Ang naunang pangyayari na sariwa pa sa isipan ng mga tao ay ang pagbaril ni Master Sergeant Jonel Nuesca laban sa wala ring kalabang-laban na kanyang mga kapitbahay na sina Lola Sonya at ang apo nito sa Paniqui, Tarlac ilang buwan na ang nakalipas.
Pinutakte ng batikos ng netizens ang naganap noong si General Debold Sinas pa ang PNP Chief.
Ngayon, hindi pa umiinit sa pagiging PNP Chief Gen. Guillermo Eleazar ay naulit na naman ang pamamaril ng pulis sa pangkaraniwang tao.
Halos iisa rin ang kuwento ng dalawang pangyayari kung saan dati nang may alitan ang magkabilang panig.
Iisa rin ang ibig sabihin: Resbak ang ginawa ng dalawang pulis sa kanilang mga nakaalitan.
Hindi nararapat sa PNP ang mga ginawa nina Nuesca at Zinampan dahil utak kriminal kasi ang ipinamalas nilang ugali.
Nagpapatunay lamang na ang ilang pulis ay siga sa kanilang mga lugar.
Hindi nila sinusunod ang kanilang motto: “To serve and protect”.
Gusto siguro nila na sila ang pagsilbihan at protektahan ng sibilyan.
Maging kapwa nila pulis ay napapatay din tulad ng nangyari kay P/Corporal Higinio Wayan ng QCPD – Police Station -10.
Nag-iinuman sina Wayan, P/Cpl. Harold Mendoza, P/Cpl. Sherwin Rebot at Lorenzo Lapay sa bahay ng huli sa Brgy. Commonwealth nang mabaril ang pulis.
Ang sinapit ni Wayan ay katibayan na mayroong mga pulis na hindi mapigilan ang galit sa nakaalitan.
oOo
Para sa suhestiyon at reaksyon mag-email joel2amongo@yahoo.com at operarioj45@gmail.com o kaya magtext sa 0956-951-00-57.
104 
