DI KO GETS ni GIO ANDREW CAYANONG
ABA, may magandang balita para sa mga taga-Quezon.
Naglaan kasi ang Philippine Health Insurance Corporation (PhilHealth) ng P72.9 milyon para sa Quezon Primary Care Provider Network’s (QCPCPN) Konsulta Sandbox.
Ito’y makaraang ilunsad ang sandbox dahilan upang maungusan na ng Lalawigan ng Quezon ang iba pang sandbox sites o pilot areas tulad ng Bataan, Guimaras, South Cotabato, at Baguio City.
Ang pondo para rito ang magbibigay sa lalawigan ng kakayahang pagkalooban ng pangunahing pangangalagang pangkalusugan at serbisyong pangkalusugan ang mga residente rito.
Sinasabing bilang unang local government unit (LGU) sa bansa na nakapagtatag ng Konsulta Primary Care Provider Network (PCPN), ang Quezon Province ay kaya nang bigyan ng primary care service provider o abot-kayang serbisyong pangkalusugan ang mamamayan ng probinsya.
Taos-puso naman ang pasasalamat ni Gov. Helen Tan kay Pangulong Ferdinand “Bongbong” Marcos Jr., kasama ang PhilHealth, Department of Health, local chief executives, municipal health officers, at mga pinuno ng ospital ng lalawigan sa pagsuporta sa implementasyon ng nasabing programa. Ang pondo na inilaan ng PhilHealth sa QCPCPN Konsulta Sandbox ay nagpapakita ng malasakit ng pamahalaan sa kalusugan ng kanilang mamamayan.
Ang hakbang na ito ay isang mahusay na halimbawa ng pagsasama-sama ng pambansang ahensya (PhilHealth), lokal na pamahalaan (Quezon Province), at lokal na health care providers para mapabuti ang kalusugan ng komunidad. Ang pagkakaroon ng PCPN ay magbibigay-daan sa mga residente na makakuha ng libreng primary care consultation, health screening, diagnostic services, at mahahalagang gamot mula sa iba’t ibang health facilities.
Ang layunin ng programang ito ay mapanatili ang kalusugan ng mga tao, lalo na sa outpatient needs, na isa sa mga pangunahing aspeto ng Universal Health Care (UHC). Ang suporta ng lokal na pamahalaan, pati na rin ng lokal na health officers at ospital, ay mahalaga para sa matagumpay na implementasyon ng programa.
Sa huli, ito ay isang hakbang patungo sa mas mabuting sistema ng kalusugan sa Quezon Province at isang patunay na sa pagsasama-sama ng iba’t ibang antas ng pamahalaan ay makakamit ang layunin ng Universal Health Care sa bansa. Ang programang ito ay magdadala ng mas mura at de-kalidad na serbisyo sa kalusugan para sa mga residente.
![](https://saksingayon.com/wp-content/plugins/dp-post-views/images/eyes.png)