HINDI dumalo sa unang araw na itinakda para sa kanyang pagharap sa Impeachment Court si Davao City Mayor Sebastian “Baste” Duterte kaugnay ng paglilitis sa impeachment case laban sa kanyang kapatid na si Vice President Sara Duterte.
Sa halip, humiling ang alkalde na ngayong Martes, September 29, o Miyerkoles, September 30, na lamang siya humarap sa impeachment trial.
Sa binasang request ni Impeachment Court Presiding Officer Francis “Chiz” Escudero, humihiling si Mayor Baste ng sapat na panahon upang makalap, ma-authenticate at maiprisinta ang mga dokumentong ipinatawag ng korte kaugnay ng Article II o unexplained wealth case ni Vice President Sara.
Inaasahang haharap si Mayor Baste sa Impeachment Court sa September 29 o September 30.
Nakaaantok ang Tanong
Samantala, pinuna ni Impeachment Court Presiding Officer Francis “Chiz” Escudero ang pagkakaidlip ni Manila Representative Benny Abante habang isinasagawa ang pagdinig sa Senate Session Hall.
Nakapuwesto si Abante sa likuran ng witness stand o sa VIP gallery nang mapansin ni Escudero na nakakatulog ito.
Hiniling ni Escudero kina Representative Lorenz Defensor at Representative Robert Ace Barbers na kalabitin si Abante upang magising.
Pabirong sinabi naman ni Representative Gerville Luistro na ipinagdarasal ni Abante ang House Prosecution team.
Sa panayam, inamin ni Abante na nakaidlip siya habang nanonood ng hearing dahil alas-2 na ng madaling-araw nang siya ay makatulog.
Bukod dito, sinabi niyang nakakaantok din ang mga tanong ng defense panel kaya hindi niya napigilan ang kanyang sarili na makatulog.
Nangyari ang insidente habang sumasailalim sa cross-examination ang testigong si PhilGEPS Division Chief Rendell Sopeña.
(DANG SAMSON-GARCIA)
53 
