Ni ANN ENCARNACION
TARGET ni Rubilen Amit ipagtanggol ang kanyang Predator World 10-Ball title sa Austria.
Sinabi ng double gold medalist sa nakalipas na Southeast Asian Games sa Hanoi, Vietnam na ibibigay niya ang lahat ng kanyang makakaya upang madepensahan ang kanyang korona.
Ang 64-woman cue masters sa mundo, kasama si multi world 9-ball champion at Hall of Famer Kelly Fisher ng Great Britain, ay maglalaban-laban para sa prestihiyosong billiard tourney.
Maliban kay Amit, sasabak din para sa pambansang koponan si Chezka Centeno, na kapapanalo lang sa inaugural Asian 9-Ball Women Championship sa Singapore.
Bukod sa individual event, aaksyon din si Amit sa mixed team event kasama sina reigning US Open champion Carlo Biado at SEA Games gold medalist Johann Chua.
Aminado si Amit, nakararamdam siya ng matinding pressure lalo sa mixed team event, ngunit lalaban ng husto para sa Pilipinas.
