(NI KEVIN COLLANTES)

MAKAAASA ang mga consumer ng bawas sa kanilang bayarin sa kuryente ngayong buwan ng Hunyo.

Ito’y dahil inianunsiyo na ng Manila Electric Company (Meralco) na magpapatupad sila ng 19-sentimo kada kilowatt hour (kwh) na bawas sa kanilang singil para sa June billing.

Sa paabiso ng Meralco, nabatid na ang naturang P0.19/kwh ay bunsod na rin nang pagbaba ng P0.135/kwh sa generation charge at mas mababang presyo ng presyo ng spot market.

Kung isasama umano ang bawas-singil noong nakaraang buwan ay aabot na sa 50-sentimo kada kwh ang kabuuang bawas sa singil ng kuryente sa nakalipas na dalawang buwan.

Sinabi ng Meralco na mas malaki pa sana ang ibababa ng kanilang singil kung hindi lamang sana manipis ang suplay ng kuryente sa Luzon grid.

Ayon sa Meralco, ang naturang bawas-singil sa June billing ay katumbas ng P38 na matitipid ng mga household na nakakakonsumo ng 200kwh at P57 na bawas sa mga nakakagamit ng 300kwh bawat buwan.

Ang mga kumukonsumo naman ng 400kwh ay makakatipid ng P76 kada buwan at P95 naman ang mababawas mula sa mga nakakagamit ng 500kwh kada buwan.