WINAKASAN ng mga tauhan ni PNP-Police Regional Office 5 Director, P/Brig. General Jonnel C. Estomo ang 15 taong pagtatago ng puganteng rape suspect nang masakote ito sa Barangay Poblacion Zone 1, Del Gallego, Camarines Sur.
Kinilala ni P/BGen. Estomo ang rape suspect na si Reynaldo Baldon Melleza ng Sitio Bukal, Brgy. Kinatakutan, Tagkawayan, Quezon, itinuturing bilang top 4 most wanted personality sa bayan ng Gallego sa lalawigan ng Camarines Sur.
Makaraan ang validation and intelligence operation, ikinasa ni P/Capt. Ermelo G. Dichoso, hepe ng Del Gallego Municipal Police, katuwang ang mga elemento ng 1st Police Mobile Force Company ng Camarines Sur PPO, ang law enforcement operation laban kay Melleza.
Armado ng warrant of arrest na inisyu ni Hon. Cecilia R. Borja-Soler, presiding judge ng RTC Branch 29, 5th Judicial Region, Libmanan, Camarines Sur, ay sinalakay ang pinagtataguan ng suspek sa Brgy. Poblacion Zone 1, Del Gallego.
Napag-alaman, halos 15 taon nagtago ang suspek makaraan umanong gahasain ang isang alyas Devine sa bahay nito sa Libmanan, Camarines Sur. (JESSE KABEL)
190 
