1st QC 10-Ball Open ALCANO NAKAWALA SA LOSER'S BRACKET

ISA pang pro player sa katauhan ni 2006 WPA World 9-Ball at 2007 WPA World 8-Ball champion Renato Alcano ang umahon sa loser’s bracket upang makasama sa Group B qualifiers sa ginaganap na 1st Quezon City 10-Ball Open sa Hard Times Sports Bar, nasabing lungsod.

Unang nabigo ang 48-anyos mula Calamba, Laguna at dating miyembro ng national team na si Alcano kontra Alvin Barbero, 6-8, bago bumalikwas sa dalawang matira-matibay na laro sa loser’s bracket laban kina Monty Paraiso, 8-0, at Albert Estacio, 8-4, upang dumerecho sa susunod na yugto ng torneo.

Umusad sa susunod na round mula sa winner’s bracket sina Assis Tadique sa pag-okupa sa B1 pool, Jolo Aspuria sa B2, Alvin Barbero sa B3 at Benjie Guevarra sa B4.
Kabilang naman sa nagkuwalipika mula sa loser’s bracket sina Jeffrey Ignacio sa B5 pool, Allen Cala sa B6, Alcano sa B7 at Paul John Ortega sa B7.

Nauna kay Alcano, 2007 Southeast Asian Games men’s 8-Ball singles at 2005 SEAG 15-Ball singles at doubles gold medalists, umahon din sa loser’s bracket si 2006 Asian Games 9-Ball singles silver medalist Jeff De Luna bago napasama sa sumunod na round.

Ilan pa sa mga kilalang cue artists na nakikipaggitgitan sa 1st QC 10-Ball Open sina present at past national team members Roberto Gomez, Antonio Lining, Marlon Manalo, Django Bustamante at Johann Chua. (ANN ENCARNACION)

417