ISUSULONG ni Negros Occidental Rep. Javier Miguel Benitez ang panukalang batas na lilikha ng libre, integrated at AI-searchable national database ng mga batas at jurisprudence sa Pilipinas.
Ayon kay Benitez, layunin nitong gawing mas accessible sa publiko ang mga batas bilang bahagi ng digital public infrastructure para sa hustisya at pagpapatupad ng batas.
Tinawag ng mambabatas na isang “quiet injustice” ang sitwasyon kung saan maraming Pilipino ang saklaw ng mga batas na hindi madaling ma-access o mahanap.
“We have ended up with two tiers of law in one Republic. One for those who can pay to understand it, and one for everyone else,” ani Benitez.
Bagama’t libre umanong makita ang teksto ng mga batas sa Official Gazette at Supreme Court E-Library, sinabi ni Benitez na ang mga updated, consolidated at searchable versions ay karaniwang nasa likod ng mamahaling commercial subscriptions.
“A Makati firm pays without a second thought. A farmer in Victorias will never see it,” dagdag pa nito.
Iniangkla rin ng kongresista ang panukala sa Article 3 ng Civil Code na nagsasabing “ignorance of the law excuses no one.”
Giit ni Benitez, kung maaaring parusahan ang mamamayan dahil sa hindi pag-alam sa batas, obligasyon din ng estado na tiyaking naaabot at nauunawaan ito ng publiko.
Binanggit din niya ang desisyon ng Korte Suprema sa Tañada v. Tuvera na nagtatakda ng kahalagahan ng publication ng mga batas.
Batay sa datos ng World Justice Project, isa lamang sa limang Pilipino na may legal problem ang may access sa anumang legal help.
Samantala, nasa 850,000 kaso kada taon umano ang hinahawakan ng Public Attorney’s Office sa tulong lamang ng humigit-kumulang 2,400 abogado.
Sa 2025 Rule of Law Index, nasa ika-97 puwesto ang Pilipinas mula sa 143 bansa at ika-13 sa 15 bansa sa rehiyon.
Ipinunto rin ni Benitez na may umiiral nang kahalintulad na sistema sa ibang bansa gaya ng European Union, India, Australia, Kenya at maging sa Cornell University sa Estados Unidos.
(PAOLO SANTOS)
87 
