BAGO pa magsimula ang impeachment trial ni Vice President Sara Duterte, sari-sari na ang opinyon kung sino ang dapat mamuno bilang Presiding Officer. May mga nagduda, may mga umalma, at mayroon ding naghintay muna bago humusga.
Ngayon na natapos na ang unang linggo ng paglilitis, lumalabas na hindi lang mga senador ang kuntento sa naging takbo ng proceedings. Maging ilang kilalang eksperto sa batas at personalidad na sumusubaybay sa impeachment ay nagbigay ng positive reviews sa pamumuno ni Senator Chiz Escudero bilang Presiding Officer.
Hindi naging madali ang kanyang tungkulin. Halos bawat araw ay may procedural objections, constitutional issues, at mahahabang argumento mula sa prosecution at defense. Gayunman, nanatiling maayos ang daloy ng paglilitis at mabilis na nareresolba ang mga usaping kailangang pagpasyahan.
Ayon kay UP College of Law Associate Dean Atty. Paolo Tamase, malaking bentahe ang pagkakaroon ng abogado bilang Presiding Officer. Ang impeachment ay hindi lang usaping pampulitika kundi isang legal na proseso na nangangailangan ng agarang pagdedesisyon sa procedural at constitutional questions.
Isa sa mga nagbago ng pananaw ay si constitutional law professor Tony La Viña. Bagama’t may pag-aalinlangan siya noong una, sinabi niyang naging episyente ang proceedings dahil abogado ang namumuno at mabilis na nakapaglalabas ng mga ruling.
Para naman kay writer at cultural critic Kristine Stuart Santiago, hindi lang legal expertise ang ipinakita ni Escudero. Nakatulong din ang kanyang mahabang karanasan sa Senado sa pagpapanatili ng kaayusan habang mainit ang palitan ng magkabilang panig.
Kapansin-pansin ding kapwa positibo ang naging komento ng prosecution at defense. Pinuri ni Lead House Prosecutor Gerville Luistro ang paghahanda at kasipagan ni Escudero, habang sinabi naman ni defense spokesperson Atty. Michael Poa na naging maayos ang takbo ng impeachment trial. Nagbigay rin ng mataas na marka si dating Supreme Court Associate Justice Adolfo Azcuna sa naging pagganap ni Escudero bilang Presiding Officer.
Sa huli, hindi naman ang bawat ruling ang sukatan ng pagiging mahusay na Presiding Officer. Mas importante kung napapanatiling maayos ang proseso, napakikinggan ang magkabilang panig, at naipatutupad ang batas nang patas. Sa unang linggo pa lang, ito ang nakita ng maraming eksperto sa pamumuno ni Senator Chiz Escudero.
117 
