TARGET ni KA REX CAYANONG
MAHALAGA ang ginawang hakbang ng Bureau of Customs (BOC) sa pagsasampa ng mga reklamo sa Department of Justice (DOJ) laban sa 14 na indibidwal kaugnay ng umano’y misdeclared agricultural products.
Hindi maliit na usapin ang ganitong kaso. Malaking halaga ng mga produktong agrikultura ang sangkot at maaari itong makaapekto sa patas na kalakalan at sa mga lehitimong negosyante.
Ayon sa BOC, anim na shipments ang idineklarang “chicken lollipops,” ngunit sa inspeksyon ay natuklasang naglalaman ang mga ito ng 15,029 sako ng fresh white onions at 2,164 kahon ng fresh carrots.
Tinatayang nasa P17.5 milyon ang halaga ng mga produktong sangkot sa kaso, ayon kay Customs Commissioner Ariel Nepomuceno.
Mas mahalaga rito ang mensaheng ipinakikita ng BOC. Hindi dapat maging normal ang maling deklarasyon para makalusot sa mga proseso ng pamahalaan.
Kung mapatutunayang may paglabag sa batas, dapat talagang managot ang mga responsable sa pamamagitan ng tamang proseso.
Kapansin-pansin din na kasama sa mga reklamong inihain ang ilang kawani mismo ng BOC.
Mahalaga ito dahil hindi sapat na habulin lamang ang mga importer o trader na sangkot sa ilegal na gawain.
Kung may mga tauhan ng gobyerno na napatunayang tumulong o nagpabaya sa tungkulin, dapat din nilang harapin ang kaukulang pananagutan.
Sa ganitong paraan, naipakikita na walang dapat maging espesyal na trato sa loob mismo ng ahensya.
Mahalaga rin ang due process. Ang pagsasampa ng reklamo ay hindi pa nangangahulugan na napatunayang nagkasala na ang mga respondent.
Ang DOJ ang dapat magsagawa ng kaukulang pagsusuri at proseso upang matukoy kung may sapat na basehan para ituloy ang mga kaso.
Gayunman, tama lamang na maging matatag ang BOC sa paglaban sa smuggling at misdeclaration ng mga produktong agrikultura.
Hindi lamang kita ng pamahalaan ang nakataya rito.
Kasama rin ang proteksyon sa mga lehitimong negosyo, magsasaka, mamimili at sa seguridad ng suplay ng pagkain.
Samakatuwid, dapat ipagpatuloy ng BOC ang ganitong pagpapatupad ng batas—matatag laban sa paglabag, patas sa lahat, at walang pinipiling protektahan, kabilang ang sarili nitong hanay.
77 
